Nutaarmiut/Ikerasarssuk

Nutaarmiut qeqertamiipput Baffin-ip Kangerliumarnani ateqaatigisamini, Upernavimmit 91 km missiliorlugit avannarpasinnerusumi. Nutaarmiuniit 1 km missiliorlugu avannarpasinnerusumiippoq nunaqarfik Ikerasaarsuk, qeqertannguami amitsumi, Nutaarmiuniit ikerasannguamik amitsumik avissaaruteqarluni. Ikerasaarsuk arfinilinnik innuttaqarpoq Nutaarmiut 26-nik innuttaqqartut (ulloq 1.2. 2013) ataatsimoorlutik tassaapput Upernaviup pigisaani inoqarfiit minnerpaartaat. 

Innuttakinnerat nunaqarfiillu taakkua marluk imminnut qaninnerat tunngavigalugu, Nutaarmiut Ikerasaarsullu ataatsimoortillugit pilersaarusiuunneqarput. 

Anguniakkat sammisallu pingaarutillit

Sullissinermi pissutsit atuuttut inissatigullu neqeroorutit nunaqarfiup alliartorneranut naleqqussarneqassapput. Nunaqarfiup alliartoqqissinnaanera killingisa iluini pissaaq. Inuussutissarsiutit ineriartortinneranni, pingaarnertut qulakkeerneqassaaq, aalisarnermik piniarnermillu inuussutissarsiuteqarnerup nukittorsarneqarnissaat. Nunaqarfiit suli innuttaminnut najukkatut pitsaasutut ingerlasinnasariaqarput. Nunaqarfiit inuuneranni aalisakkanik tunisassiorfik eqqarsaatersuutigineqarsinnaavoq imaluunnit immikkortillugu inissillugu nunaqarfinnut attavilittut.

Innuttaasut ineqarnerlu

Nutaarmiuni innuttaasut amerlassusaat, 1980-mi 75-siusimagaluarlutik, ikiliartuaaginnarsimapput. Ikerasaarsummi innuttaasut aammattaaq sukkasuumik ikiliartorsimapput, 2000-mi 17-niit ullumikkut arfinilinnut.  Innuttaasut immikkut eqqorneqaatigisimavaat Upernavik Seafood A/S-p tunisassiorfiata matuneqarnera. Illut tamakkerlutik ilaqutariinnit ataasiakkaanit illorineqarput.

Nutaarmiuni Ikerasaarsummilu sanaartukkat akuttusoorujussuarmik inissitsitigaapput, inissarlu nunaqarfiup alliartorfigisinnaasaa annertoqaaq. Nuaqarfinni taakkunani marlunni inissaq sanaartorfiusinnaasoq sinneruttooq katillugu naatsorsuutigineqarpoq illunut 65-nut naammassasoq.

Inuussutissarsiutit umiarsualivillu

Nutaarmiuni Ikerasaarsummilu inuussutissarsiutit pingaarnerit tassaapput puisinniarneq qaleranilliarnerlu, nunaqarfiillu umiarsualivittut taaneqarsinnaasumik soqanngillat. Nunaminertaq annikitsoq Nutaarmiut kujasinnerusortaaniittoq, inuussutissarsiornermi umiarsualiveqarnermilu siunertanut atugassaq, immikkoortinneqarnikuuvoq.

Suliffissat pingaartumik piniarnermut aalisarnermullu tunngasuupput, aammali suliffeqarpoq nunaqarfiup sullinneqarneranut tunngasunik, annikikkaluamillu takornariaqarnermi. 2010-mi nunaqarfinni suliffissarsiortut amerlassusaat 4 %-ip missingaa, kommunip agguaqatigiisitsineranut (6 %-mut) sanilliullugu appasinnerulluni.

Kommuneplani malillugu inuussutissarsiutinut umiarsualivimmullu tunngasuni inissaq sinneruttoq 24.000 m2 missiliorlugu annertussuseqarpoq.

Angallannermi periarfissat teknikkikkullu atortut

Nunaqarfiit taakkua helistop-eqaratillu aqqusineqanngillat. Angallannermi periarfissat allat tassaapput imaatigut angallatit, qimussit snescooterillu.

Nunaqarfiit imermik pilersugaanngillat eqqakkanullu kuuffeqaratik. Taamaattumik imeq illulerinermiit igitaq pinngortitamut kuutsiinnarneqartarpoq. Eqqaavissuaq Nutaarmiut avannaaniippoq, tassani eqqakkat ammaannartumi ikuallanneqartarput, unnuaaneranilu eqqakkat, unnuaanerani eqqakkat tummeraasaanniit nutamiit, imaluunnit ruujorikkoortillugit imaanut iginneqartarlutik. Innaallagissamik kiassarnermillu pilersuineq Nukissiorfiit ingerlataraat, TELE Greenlandip oqarasuaatit assigissaallu atorlugit attaveqarneq isumagisarigaa.

Nutaarmiuni sullisiviit tassaapput, oqaluffik, nunaqarfimmi atuakkanik atorniartarfik, atuarfik aamma immikkoortortap allaffia. Nunaqarfik pisiniarfeqanngilaq peqqinnissamulluunnit sulissiveqarani, aammattaaq meeqqanik paarsissarneq aqqissuussivigineqarnikuunngilaq. Ikerasarssummi sullissiveqanngilaq.

Ilinniartitaaneq

Meeqqat atuarfiat, Nutaarmiut Atuarfiat, sisamat missiliorlugit atuartoqarpoq atualeqqaaniit 7. klassimut.

Kulturi aamma sunngiffik

Oqaluffik Nutaarmiuni Ikerasaaesummilu inuppalaartumik kulturikkullu ingerlatanut sinaakkutaavoq. Sunngiffimmi neqeroorutaasinnaasunik allanik soqanngilaq.

Aammattaaq Nutaarmiuni Ikeraarsummiluunniit eriagisarialinnik toqqaasoqarnikuunngilaq.

Qaasuitsup Kommunia · Postboks 1023 · 3952 Ilulissat · Grønland · www.qaasuitsup.gl · E-mail: plan@qaasuitsup.gl · Tlf.: +299 947800
Kingullermik iluarsineqarpoq 29-3-2017